Да дня роднай мовы

Дата: 20 февраля 2021 в 16:15, Обновлено 20 февраля 2021 в 22:41
Автор: Митрахович В. С.
317 просмотров

З 15 па 20 лютага ў школе праводзіўся Тыдзень роднай мовы і літаратуры “Табе складаю шчыры свой санет…” настаўнікамі Нінай Рыгораўнай Тукач і Таццянай Уладзіміраўнай Дайнека.

​ ​ ​ ​ ​ ​ ​ ​ Распачаўся тыдзень сімвалічна: гэта ўрок беларускай мовы ў 7 класе па тэме “Ступені параўнання прыслоўяў”. Так, з дапамогай прыслоўяў можна выказаць, у якой ступені ведаем мову – добра, лепш, больш добра, менш добра. У гэты ж дзень 7 клас разам з шасцікласнікамі стаў ўдзельнікам Свята роднай мовы.
        Гульня-конкурс “Наша родная мова” сабрала зборныя каманды 5 (“Васілёчкі”) і 6 (“Каласочкі”) класаў, каб у адкрытым спаборніцтве вызначыць, хто больш ведае родную мову. Запрашэнне Лізаветы Баранавай словамі з верша Ігара Пракаповіча “Пагавары са мной на мове, на нашай роднай, не чужой” былі ўзяты ў якасці дэвіза мерапрыемства. Каманды прайшлі 9 прыпынкаў-заданняў. “Каласочкі” так добра і упэўнена пачалі гульню, але “Васілёчкі” на палове спаборніцтва сабраліся з сіламі і перамаглі сапернікаў.
         Адзін добры вопыт важней сямі мудрых павучэнняў. Гэтая мудрая ісціна стала тэмай серады. І сапраўды інтэлектуальная гульня “Што? Дзе? Калі?” дала магчымасць вучням 9 і 10 класаў атрымаць добры вопыт у каманднай гульні. Пытанні, падрыхтаваныя да гульні настаўнікамі беларускай мовы і літаратуры,​ мелі розны фармат і вымушалі гульцоў праявіць сябе з боку выдатных знаўцаў граматыкі беларускай мовы. Прыемная атмасфера жывога спаборніцтва распаўсюдзілася на ўсіх удзельнікаў. Гульня завяршылася з лікам 6:2 на карысць каманды вучняў, а самым лепшым гульцом гульні па меркаванні каманды стаў Уладзіслаў Караткевіч.
         Насычаным на падзеі быў чацвер. Ужо ранкам вучні 7, 10, 11 класаў разам са сваімі класнымі кіраўнікамі сабраліся на літаратурнай віктарыне да стагоддзя І.П. Мележа, заснаванай на жывой цікавасці школьнікаў да літаратуры, на імкненні даведацца нешта новае з жыцця і дзейнасці пісьменніка. З непрыхаваным інтарэсам пазнаёміліся з фрагментамі кінафільма Аляксандра Анісімава “Туманы над багнаю” і вызначылі лепшага знаўцу жыцця і творчасці нашага класіка. Гэта вучаніца 10 класа Ангеліна Кароль. Прыемная і тая навіна, што колькасць удзельнікаў гульні-конкурсу “Буслік” з кожным годам расце. Сёлета жадаючых ​ было 29 вучняў з 3-11 класаў, а значыць развіваецца і падтрымліваецца цікавасць школьнікаў да вывучэння роднай мовы, літаратуры і мовазнаўства. Вучні 9 класа на конкурснай праграме “Квітней, родная мова!”правяралі свае веды па гісторыі, культуры, літаратуры нашага краю, да месца гучалі вершы Міхася Пазнякова, Пімена Панчанкі, Ніла Гілевіча. А вучні 8 класа сустрэліся на турніры юных філолагаў “І звонкае “дзе” і густое “чаго”. Барацьба паказала, што самым лепшым юным філолагам стаў Ігнат Старавойтаў, апярэдзіўшы бліжэйшую канкурэнтку Ганну Зайчанка толькі на 0,5 бала. А значыць дзясятка па беларускай мове ў кішэні Ігната.
​ ​ ​ ​ ​ ​ ​ ​ Яшчэ адна нагода звярнуцца да твораў І.Мележа​ стала своеасаблівая майстэрня мастака, у межах якой вучні ўяўлялі сябе мастакамі-ілюстратарамі і стварылі малюнкі да твораў пісьменніка “Па старонках “Палескай хронікі”.
​ ​ ​ ​ ​ ​ ​ ​ Шчыра спадзяюся: гэты тыдзень знойшоў водгук у сэрцах усіх, хто любіць родны край, родную мову, родны народ, і абудзіць душы тых, хто блукае і яшчэ не знайшоў шлях да Беларусі.
                                                                               Дайнека Таццяна Уладзіміраўна, настаўнік беларускай мовы і літаратуры
Все новости
Комментарии:
Оставлять комментарии могут только авторизованные посетители.